មានមនុស្សច្រើនណាស់ដែលនិយាយ ខ្ញុំសុខចិត្តទ្រាំឬសុខចិត្តលេបការឈឺចាប់គ្រប់យ៉ាងដើម្បីបានជាក្តីសុខដល់មនុស្សជាទីស្រឡាញ់ឬជាទីគោរពរបស់ខ្លួន។សូមអ្នកគិតឡើងវិញអំពីចិត្តមួយនេះ គឺចិត្តដែលអ្នកនិយាយថាជាចិត្តលះបង់នេះ។ បើពិតជាការលះបង់ពិតប្រាកដមែន ដាច់ខាតត្រូវតែមានការពេញចិត្តនៅលាយឡំនឹងការឈឺចាប់នៃការបាត់បង់នោះដោយខានមិនបានឡើយ ជួនកាលគ្មានការឈឺចាប់ទាល់តែសោះ គឺមានតែការពេញចិត្ត ទោះបីការលះបង់នោះធំធេងយ៉ាងណាក៏ដោយ។ ការលះបង់គឺដើម្បីអោយមនុស្សជាទីស្រឡាញ់ឬជាទីគោរពបានសប្បាយ បានក្តីសុខ ចុះបើខ្លួនអ្នកលះបង់មានការឈឺចាប់ តើមនុស្សជាអ្នកទទួលបានការលះបង់របស់គេនោះ ជាមនុស្សប្រភេទណាទៅទើបចិត្តអាចមានក្តីសុខនៅពេលដែលអ្នកលះបង់អោយខ្លួនមានការឈឺចាប់នោះ? ការលះបង់គឺត្រូវផ្តល់ទៅអោយមនុស្សដែលមានតំលៃសមនឹងទទួលបាននូវការលះបង់នោះ បើពិតជាការលះបង់ពិតប្រាកដមែន ដាច់ខាតក្នុងការឈឺចាប់នៃការលះបង់មានការពេញចិត្តនៅក្នុងនោះដោយខានមិនបានឡើយ លះបង់តូច ការពេញចិត្តក៏តូចដែរ លះបង់ធំធេង ការពេញចិត្តក៏នឹងត្រូវតែមានទំហំធំធេងប៉ុណ្ណោះដែរ ជួនកាលការលះបង់រិតតែធំ ការឈឺចាប់ក្នុងចិត្តគ្មានទាល់តែសោះ ការសោកស្តាយគ្មានទាល់តែសោះ គឺមានតែការពេញចិត្តសុទ្ធសាធ។ព្រោះតែមានតែការពេញចិត្តក្នុងការលះបង់នេះហើយ ទើបមនុស្សល្អ មនុស្សដែលមានតំលៃសមនឹងគេលះបង់អោយ មានចិត្តព្រមទទួលនូវការលះបង់ឬការបរិច្ចាកនោះ បើដឹងថាការលះបង់ឬការបរិច្ចាកនោះ មានការឈឺចាប់ដល់អ្នកលះបង់នោះ មនុស្សល្អទទួលយកការលះបង់នោះមិនកើតទេ ព្រោះទទួលយកការលះបង់បានលុះត្រាតែយើងអ្នកទទួលក៏បានសុខបានសប្បាយហើយអ្នកលះបង់ឬអ្នកបរិច្ចាកក៏បានសប្បាយឬបានពេញចិត្តក្នុងការលះបង់ឬការបរិច្ចាកនោះដែរ។ មនុស្សស្រីខ្លះ ពេលប្តីលួចផិក្បត់ ដោយមានការឈឺចាប់ខ្លាំងពេកនាងក៏សំរេចចិត្តដើរចេញ។ការសំរេចចិត្តដើរចេញមិនមែនជារឿងខុសទេក្នុងករណីខ្លះ ប៉ុន្តែសូមកុំយល់ច្រឡំថានោះជាការលះបង់ប្តីអោយទៅនាងប្រពន្ធក្រោយអោយសោះ ព្រោះថាបើជាការលះបង់ពិតប្រាកដនាងត្រូវតែមានការពេញចិត្តនឹងផ្តល់អោយប្តីនូវក្តីសុខមួយ បើប្តីនាងជាមនុស្សល្អតើគេអាចបានសុខនឹងការឈឺចាប់របស់នាងយ៉ាងណាទៅកើត មិនមែនជាការលះបង់ទេ តែវាជាទណ្ឌកម្មដែលនាងដាក់អោយប្តីដែលបានផិតក្បត់នោះទៅវិញទេ តែបើប្តីនោះសប្បាយចិត្តនឹងការចាកចេញរបស់ប្រពន្ធដើម នាងសួរខ្លួនឯងទៅចុះ តើមនុស្សថោកធុនប្តីនាង សប្បាយចិត្តនឹងនាងចាកចេញ សក្តិសមនឹងទទួលបានការលះបង់របស់នាងដែរឬទេ? វានៅតែមិនមែនជាការលះបង់ឬការផ្តល់អោយតែដដែល គឺនាងអាចមើលឃើញមនុស្សប្រុសធុននេះមិនសមអាត្មាអញបន្តរស់នៅជាមួយទេដែលនាងចាកចេញទៅនោះ។ សរុបមក ការលះបង់ក្នុងភាពភ្លឺស្វាង ទីមួយត្រូវរកមើលអោយឃើញនៅក្នុងចិត្តអ្នកថា មនុស្សនេះសមនឹងទទួលបាននូវការលះបង់បែបនេះពីអាត្មាអញណាស់ ទីពីរ ដាច់ខាតត្រូវតែមានការពេញចិត្តឬសប្បាយចិត្តក្នុងការអស់ទៅនៃអ្វីដែលជារបស់យើងដើម្បីអោយបានទៅដល់មនុស្សដែលយើងចង់ផ្តល់អោយនោះ បើអ្នកសំគាល់ថាអ្នកមានតែការឈឺចាប់តែម្យ៉ាងក្នុងការលះបង់ទៅអោយនោះ នោះមិនមែនជាការលះបង់របស់អ្នកទេ តែវាជាការជៀសវាងក្នុងការបាត់បង់ទៅ ឬជៀសវាងក្នុងការផ្តល់ទៅអោយគេ មិនបានទៅវិញទេតែប៉ុណ្ណោះ។ ការលះបង់ពិតប្រាកដ អ្នកលះបង់ក៏បានសុខក្នុងចិត្ត បានសប្បាយចិត្ត បានពេញចិត្ត ហើយអ្នកទទួលក៏បានសុខពីការបានទទួលនូវការលះបង់របស់គេ ហើយនឹងសុខក្នុងចិត្តដោយដឹងថាម្ចាស់គេបានពេញចិត្ត សប្បាយចិត្តនឹងបានបរិច្ចាកឬលះបង់នោះ។ អោយតែនិយាយដល់ការលះបង់គឺមានម្ខាងជាអ្នកបាត់បង់ដោយជៀសមិនរួចឡើយ តែការសប្បាយឬក្តីសុខក្នុងផ្លូវចិត្តត្រូវមានទាំងសងខាង។ ពាក្យថាលះបង់ បៀមនូវពាក្យថា "សុខចិត្ត" សុខក្នុងផ្លូវចិត្ត ក្នុងការលះទៅ។ សុខចិត្តទ្រាំ មានន័យទ្រាំដោយមានក្តីសុខក្នុងចិត្ត។ សុខចិត្តលេបការឈឺចាប់ មានន័យថា មានក្តីសុខព្រមក្នុងចិត្ត នឹងលេបការឈឺចាប់នោះ។ អ្នកដែលបានធ្វើការលះបង់ពិតប្រាកដ មិនមែនជាអ្នកបាត់បង់ទេ តែជាអ្នកទទួលបាននូវរបស់មួយជាទីពេញចិត្តរបស់ខ្លួន។ យើងអាចនិយាយដោយខ្លីថា "អ្នកលះបង់ពិតប្រាកដ មិនមែនជាអ្នកអស់ទេ តែគឺជាអ្នកបាន" ។។
6 hrs · Public
